پەنابەران و کرێکارانی بیانی لە لەندەنی پایتەختی بەریتانیا خۆپیشاندانیان دژی قورسکردنی مەرجەکانی مانەوە و مافەکانیان ئەنجامدا، ئەوەش دوای زنجیرەیەک بڕیاری نوێی حکومەتی ئەو وڵاتە.
پێشتر کرێکارەکان پێویستیان بە پێنج ساڵ بوو بۆ وەرگرتنی مافی مانەوەی هەمیشەیی،بەڵام بڕیارە بکرێتە 10 ساڵ و ئەوانەشی لەسەر هاوکاریی حکومەت دەژین، دەبێت 15 بۆ 20 ساڵ چاوەڕێ بکەن.
ئامانجی حکومەت لەو گۆڕانکارییانە کەمکردنەوەی ژمارەی کۆچبەران و ئەو گوشارە داراییەیە کە لەسەر خزمەتگوزارییە گشتییەکان و بودجەی دەوڵەت دروست بووە، چونکە بەگوێرەی داتاکانی حکومەتی بەریتانیا، ساڵی پار نزیکەی 16 ملیار دۆلاریان لە کۆچبەران و پەنابەران خەرجکردووە.
حکومەتی بەریتانیا دەیەوێت ساڵانە لانیکەم ملیارێک و 500 ملیۆن دۆلار لەو خەرجییە کەمبکاتەوە.
بەگوێرەی وەزارەتی ناوخۆی بەریتانیا، 1ی کانوونی دووەمی ئەم ساڵ بۆ 9ی حوزەیران، نۆ هەزار و 142 کۆچبەر چوونەتە وڵاتەکەیان، هەمان ماوەی ساڵی پار نزیکەی 13 هەزار و 500 کەس چووبوون.
